ట్రాఫిక్ పోలీసులకు చుక్కలు చూపిస్తున్న మన స్టార్ హీరోలు

గతం కన్నా వేల సంఖ్యలో వాహనాలు పెరిగిపోయాయి. ట్రాఫిక్ ని ఎంత క్రమబద్దీకరించినా సరే,కంట్రోల్ అవ్వడం లేదు. దేశంలో ట్రాఫిక్ అనేది పెద్ద సమస్యగా మారిపోయింది. ఎక్కడా హద్దులేకుండా పోతోంది. ముఖ్యంగా హైదరాబాద్ మహానగరంలో ట్రాఫిక్ లో చిక్కుకున్నామంటే ఇక అంతే సంగతులు అన్నట్లు ఉంటుంది. ఇక ట్రాఫిక్ రూల్స్ అతిక్రమించేవారి గురించి చెప్పక్కర్లేదు. ఇలాంటి వాళ్లలో టాలీవుడు సెలబ్రిటీలు కూడా ఉన్నారు. ట్రాఫిక్ రూల్స్ అతిక్రమించి చలానాలు కట్టని వాళ్లలో సూపర్ స్టార్ మహేష్ బాబు, నందమూరి బాలయ్య,జనసేన అధినేత పవన్ కళ్యాణ్,నితిన్ తదితరులు ఉన్నారని హైదరాబాద్ ట్రాఫిక్ పోలీసులు చెబుతున్నారు.

వేగంగా వెళ్తూ సిసి కెమెరాలకు చిక్కారని,అందుకే చలానాలు రాసి పంపినా కట్టడం లేదని వాపోతున్నారు. వీళ్లల్లో మిగతా హీరోలతో పోలిస్తే జనసేన నేత పవర్ స్టార్ పవన్ కళ్యాణ్ పర్వాలేదని చెప్పాలి. ముఖ్యంగా యువత తమ అభిమానులు ఏది చేస్తే వీళ్ళు అదే చేస్తున్నందున చలానాలు కట్టేసి ఆదర్శంగా ఉంటె మంచిది కదా అనే కామెంట్స్ వినిపిస్తున్నాయి.

ఇందులో మహేష్ బాబు కి గత ఏడాది కాలంగా ట్రాఫిక్ రూల్స్ అతిక్రమించిన కారణంగా 7చలానాలకు జారీ కాబడ్డాయి. ఇతడి కారు నెంబర్ ఎపి 09సీఎం4005పై 8,745రూపాయల జరిమానా బాకీ వుంది. ఔటర్ రింగ్ రోడ్డుపై వేగంగా కారు నడిపి నిబంధనలు ఉల్లంఘించినట్లు పోలీసులు చెబుతున్నారు. 2015నుంచి బకాయి పడ్డాడు.

ఇక టిడిపి ఎమ్మెల్యే నందమూరి బాలకృష్ణ అతివేగంగా కారు నడుపుతూ ఒక వెయ్యి 35రూపాయల జరిమానాతో చలానా జారీ అయింది. హైదరాబాద్ రాజేంద్ర నగర్ లో చెన్నమ్మ హోటల్ దగ్గర బాలయ్య పేరిట గల ఎపి 36యు 0001కారు అతివేగంగా దూసుకెళ్లడంతో అధికారులు జరిమానా విధిస్తూ చలానా జారీచేశారు. 2018లో జారీ అయినప్పటికీ ఈయన ఇంకా చెల్లించలేదు.

జనసేన అధినేత కొణిదల పవన్ కళ్యాణ్ కూడా ఏపీ 09సిజి 7778 కారుకి మూడు చలానాలు జారీ అయ్యాయి. మాదాపూర్ బంజారాహిల్స్ పోలీసులు జారీచేసిన ఈ చలానా కింద 500రూపాయల బకాయి పడ్డారు. ఇక అలవాల్ ప్రాంతంలో ట్రాఫిక్ హీరో నితిన్ కి వెయ్యి రూపాయల చలానా జారీచేశారు.

కమెడియన్ సునీల్ వర్మ టి ఎస్ 11ఈజీ 3245 నెంబర్ కారు ని వనస్థలిపురం,మాదాపూర్,శంషాబాద్ ఎయిర్ పోర్టు ఔటర్ రింగ్ రోడ్డు దగ్గర వేగంగా నడపడంతో నాలుగువేల జరిమానా విధించారు. ఇంకా పలువురు ప్రముఖుల కార్ల చలానాలు పెండింగ్ లో ఉన్నాయి. అయితే 10చలానాలు పెండింగ్ లో ఉంటే కోర్టులో చార్జిషీటు వేస్తామని పోలీసులు అంటున్నారు. మరి టాలీవుడ్ సెలబ్రిటీలు ఎలా స్పందిస్తారో చూడాలి.