నిర్మాతగా సక్సెస్ అయిన డైరెక్టర్స్ ఎంత మంది ఉన్నారో…!?

tollywood dirctors turned producers :తెలుగు సినిమా పరిశ్రమలో హీరో అవుదామని వచ్చి ప్రొడ్యూసర్ గా మారిన మూవీ మొఘల్ డాక్టర్ డి రామానాయుడు ఆతర్వాత తరంలో కొడుకు వెంకటేష్, మనవడు రానా హీరోలయ్యారు. కమెడియన్స్ రాజబాబు, అలీ, సునీల్ ఇలా చాలామంది హీరోలయ్యారు. రవితేజా, నాని లాంటి వాళ్ళు అసిస్టెంట్ డైరెక్టర్ నుంచి హీరో గా మారారు. ఇలాగే చాలామంది కెరీర్ ప్రారంభంలో చిన్న పాత్రలతో మొదలు పెట్టి అనుకోకుండా స్టార్స్ అయినవారు చాలా మందే ఉన్నారు. అలాగే డైరెక్టర్స్ గా ఉంటూ నిర్మాణ రంగంలో అడుగుపెట్టిన స్టార్ డైరెక్టర్స్ ఉన్నారు. అందులో మొదటగా చూస్తే, దర్శకధీరుడు రాజమౌళి కవితా ప్రేమకథ మూవీ నిర్మించాడు.

టాలీవుడ్ టాప్ డైరెక్టర్స్ లో ఒకరైన త్రివిక్రమ్ శ్రీనివాస్ అగ్రహీరోలతో ఎన్నో సూపర్ హిట్ సినిమాలను డైరెక్ట్ చేయడమే కాదు, నిర్మాతగా చల్ మోహన్ రంగా మూవీ తీశారు. క్రియేటివ్ డైరెక్టర్ పూరీ జగన్నాథ్.తన తమ్ముడిని హీరోగా పెట్టి, బంపర్ ఆఫర్ మూవీ నిర్మించాడు. ఈ సినిమాకు డైలాగ్స్, స్టోరీ అందించి ప్రొడ్యూసర్ గా పనిచేశాడు. అల్లు అర్జున్ హీరోగా సుకుమార్ డైరెక్ట్ చేసిన ఆర్య మూవీ అప్పట్లో బాక్సాఫీసు దగ్గర బ్లాక్ బస్టర్ గా నిల్చింది. అయితే రాజ్ తరుణ్, హెబ్బా పటేల్ హీరోహీరోయిన్లుగా కుమారి 21F సినిమాను సుకుమార్ నిర్మించాడు. సుప్రీం, రాజా ది గ్రేట్, పటాస్, సరిలేరు నీకెవ్వరు, ఎఫ్ 2 వంటి హిట్ సినిమాలను తెరకెక్కించి సక్సెస్ ఫుల్ డైరెక్టర్‏గా కొనసాగుతున్న అనిల్ రావిపూడి ఇటీవల నిర్మాతగా అవతారం ఎత్తి , శ్రీవిష్ణు హీరోగా గాలి సంపత్ సినిమా నిర్మించడమే కాక, ఆ మూవీ పర్యవేక్షణ, స్క్రీన్ ప్లే కూడా అందించాడు.

దేవదాసు, సీతారామరాజు వంటి మూవీస్ డైరెక్టర్ చేసిన వైవీఎస్ చౌదరీ నిర్మాతగా అవతరించి, మాస్ మహారాజా రవితేజ, డైరెక్టర్ గుణశేఖర్ కాంబోలో నిప్పు సినిమా నిర్మించారు. అలనాటి మేటి హీరోయిన్ సావిత్రి బయోపిక్ ఆధారంగా మహానటి సినిమా తెరకెక్కించి.విమర్శకుల ప్రశంసలు అందుకున్న డైరెక్టర్ నాగ్ అశ్విన్ ప్రస్తుతం ప్రభాస్ హీరోగా భారీ మూవీ చేస్తున్నాడు.

అయితే నవిన్ పోలిశెట్టి హీరోగా జాతిరత్నాలు సినిమాను నాగ అశ్విన్ నిర్మించాడు. హ్యాపి డేస్, లైఫ్ ఈజ్ బ్యూటీఫుల్, కేరింత వంటి హిట్ సినిమాలను డైరెక్ట్ చేసిన శేఖర్ కమ్ముల .. అవకాయ బిర్యానీ మూవీ నిర్మించాడు. వేదం, కంచె, గౌతమిపుత్ర శాతకర్ణి లాంటి సూపర్ హిట్ సినిమాలను నిర్మించిన డైరెక్టర్ క్రిష్ అంతరిక్షం మూవీని మెగాప్రిన్స్ వరుణ్ తేజ్ హీరోగా నిర్మించారు. రచయితగా పనిచేసి గాలిపటం మూవీని డైరెక్టర్ సంపత్ నంది నిర్మించాడు.